«Үльгэр зуранабди» гэһэн гаршагтай интернет-урилдаан «Байгалай онтохонууд» сайт дээрэ эхилбэ. Эмхидхэгшэд болохо www.baikal-tales.ru сайтын захиргаанай мэдээсэһээр, эндэ 3-һаа 14 хүрэтэр наһанай үхибүүд хабаадаха аргатай. Тиихэдээ «Байгалай онтохонууд» сайт дээрэ табигдаатай али нэгэ үльгэрэй удхаар зураг зуража, тэрэнээ сайтын гү, али редакциин хаягаар эльгээхэ хэрэгтэй.
Тэрэ ажалынь урилдаанда гэжэ зорюута заабол өөрын гаараар бүтээгдэһэн байхаа зэргэтэй. Хабаадагша бүхэн хэдышье зураг эльгээхэ эрхэтэй. Урилдаанда хабаадаха гээ һаа «Вконтакте» (www.vk.com/baikaltales), «Одноклассники» (ok.ru/group/55027766263835), «Facebook» (www.facebook.com/baikaltales/) гэжэ олоной харилсаанай сайтнуудай бүридхэлдэ абтагдаха шухала. Зүгөөр «Үльгэр зуранабди» урилдаан тухай мэдээ саашань дамжуулан дууряаха (репост хэхэ) хэрэгтэй.
Түрүүшын шатада эмхидхэгшэд эльгээгдэһэн зурагууд сэдэбтээ таарана гээшэ гү гэжэ шэлэжэ илгаха. Удаань, түсэлэйнгээ сайт дээрэ бултыень табиха. Эгээл эндэ харагшадай он-лайн гуримаар дуугаа үгэлгын дүнгөөр эрхимүүд тодорхо юм. Гурбадахи шатада урилдаанай жюри онлайн-һунгалтаар эгээл олон дуу абаһан ажалнуудые сэгнэжэ, наһанай гурбан илгаада: 3-6 наһанай, 7-10 наһанай, 10-14 наһанай хүүгэдэй дунда илагшадые элирүүлхэ.
Урилдаанда шалгарагшад дипломуудаар, шангуудаар урмашуулагдаха. Гэхэ зуура, жюри алишье наһанай илгаада тон һонирхолтой зурагуудые эльгээгшэдтэ тусхай шагналнуудые олгуулха эрхэеэ алданагүй.
Мэдүүлгэ абаха бозор 2015 оной январиин 25-да түгэсэхэ. Тэрэнэй удаа хоёр долоон хоногой үнгэрһэн хойно урилдаанай дүнгүүд согсологдохо. Илагшад тухай мэдээсэл www.baikal-tales.ru сайтын гү, али олоной харилсаанай сайтнууд дээрэ урилдаанай тусхай хуудаһан соо табигдаха.
Зурагайнгаа скан- гү, али фото-буулгабаринуудые baikal-tales@gmail.com гэһэн сахим хаягаар ябуулха шухала. Ажалнууд формат JPG шэнжэ түхэлөөр нэгэ буулгабаряар эльгээгдэһэн байха ёһотой. Үгы гэбэл, хэлхеэ холбооной аргаар: 670000, г. Улан-Удэ, а/я 9559, али үгы һаа г. Улан-Удэ, ул. Каландаришвили,23, офис 35. хаягаар зурагаа бэеэрээ оруулхада болоно.
