Буряад Уласта «Байгалай онтохонууд» интернет-түсэл эрхилэгдэбэ

«Байкальские сказки» - «Байгалай онтохонууд» - «Baikal-tales» гэһэн мэдээсэлэй, соёл-һуралсалай шэнэ интернет-сайт Буряад орондо бии болобо. Буряад Уласай Толгойлогшын болон Засагай Газарай захиргаанай дэмжэлгээр «Восток-Телеинформ» агенство энэ түсэл болбосоруулна. Түсэл зохёожо хүтэлэгшэ мэдээсэлэй «Восток-Телеинформ» агентствын генеральна директор Анжелика Мешковагай хөөрэһөөр, иимэ сайт байгуулха тухай һанаан үнихэнэй, үшөө буряад хэлэн дээрэ хүүгэдэй номуудые гаргажа байха үеһөө буйлуулагдажа байгаа. Айл бүхэндэ энэ сайт нээжэ үльгэр онтохонуудые хамтаараа уншажа байбал бултанай байдал нарижан һайжарха һэн. Олон үндэһэ яһатанай гуламта болохо Байгалай мужын оршондо энэ ябуулга илангаяа тааруу.

Тус түсэлэй ашаар Байгалай мужа нютагуудаар ажаһуугша буряад, ород, эвенк, тофалар, армян, татар гэхэ мэтэ арадуудай түлөөлэгшэд бэе бэеынгээ үльгэр онтохонуудтай танилсаха аргатай. Эндэ шэмээшэг, хасагуудайшье түүхэ домогууд оролсохо.

Сайт дээрэ «Буряад онтохонууд», «Арадуудай урлал», «Үндэһэн хубсаһан», «Жороо болон оньһон үгэнүүд», «Буряадаар хөөрэлдэе», «Намда үльгэр хөөрэ» гэхэ мэтэ хуудаһанууд байха. Буряад арадай жэнхэни онтохонуудые согсолон суглуулха, зүгөөр ород дээрэ оршуулгатайнь эндэ табиха гэһэн тон шухала зорилгонуудай нэгэн болоно. Түрүүшын ээлжээндэ буряадуудай бултанда мэдээжэ онтохонууд оруулагдаха. Хожомоо эндэ буряад туургата зоной аман зохёолой бүхы баялиг – онтохон, үльгэрнүүд, түүхэ, домогууд суглуулагдаха зэргэтэй. Гэхэтэй хамта, жороо ба оньһон үгэнүүд тусхай хэһэг боложо табигдаха. Тиин ород хэлэн дээрэ оршуулагдаһаар буряад хэлэеэ үзэхэ хэрэгтэ туһатай заабари зүбшөөл боложо магад.

Бэшэмэл буряад онтохонуудай www.baikal-tales.ru сайт дээрэ ород дээрэ оршуулагдахадаа түрэл хэлэеэ мэдэхэгүй зондо угаа туһалха байха. Танигдаагүй үгэ сасуулан ойлгожо, хадуухада яалай. Тиигээдшье оршуулгануудые гэртээ сугтаа уншахада зохистой. Эли тодоор дуугаржа багшанар гү, али гэртэхин һургана бэзэ. Иигэжэ бодомжолходо, хүүгэд, тэдэнэй түрэлхид, баабай төөдэйнэр бултанда энэ түсэл хабаатай болоно. Эдэ бүгэдэ буряад домогой шэдитэ юртэмсын байдал руу шунган орохын хажуугаар, хэлэеэ мүлижэ элдэб урилдаан, викторинануудта хабаадаха аргатай болохол. Харин багшанар гар дороо заабариин амиды һудартай болохо жэшээтэй.

«Үльгэр домогто энэ ажаябуулгамнай та бүгэдэндэ, танай үхи хүүгэдтэ туһатай, хэрэгтэй байха аабза гээд найданаб. Юрэдөө, ямарш онтохондо сагааниинь хараяа дарадаг, һайниинь муугаа диилэдэг. Хорото хүсэнүүдые хэһээхэ хэрэг имагтал сэсэн мэргэн ухаанһаа, нигүүлэсхы зөөлэн сэдьхэлһээ эхитэй», - гээд Анжелика Мешкова тэмдэглэнэ.

«Байгалай онтохонууд» түсэл залуу буряад уран зохёолшод, зурагшадта сэхэ хамаатай. Тэдэнэртэ хүүгэдтэ зорюулагдаһан эрхим бүтээлнүүдээ энэ сайт дээрэ толилхо арга олгуулагдаха байна.

Тобшо мэдээн:

Анжелика Мешкова - «Байкальские сказки» - «Байгалай онтохонууд» - «Baikal-tales», www.baikal-tales.ru сайт зохёогшо, Ородой Холбоото Уласай гэшүүн, мэдээсэлэй «Восток-Телеинформ» агентствын дарга. Хүүгэдэй «Репка» ба «Теремок» номуудые буряад хэлэн дээрэ хэблүүлһэнэйнгээ түлөө 2014 ондо «Байгалай эдиршүүл – 2014» фестивалиин Гран-при шатын шанда хүртэһэн байна. 2014 ондо буряад хэлэн дээрэ бүтээлнүүдые гаргаха талаар «УРАН ЗОХЁОЛОЙ ЮРТЭМСЭ» гэһэн Буряад Уласай Соёлой яаманай грантын «БАГАШУУЛДА» номинацида хүртөө. Буряад, ород хэлэн дээрэ хүүгэдэй шэрдэжэ наадаха «Yндэһэтэнэй хубсаһан» гэжэ ном гаргагдаа.

«Байкальские сказки» - «Байгалай онтохонууд» - «Baikal-tales», сайт www.baikal-tales.ru сайт байгуулха түсэл Буряад Уласай Засагай Газарай буряад хэлэ дэмжэн хүгжөөхэ грантын ашаар болбосоруулагдана.